Hrísgrjóna- og skelfiskkaka

Hráefni

» 250 g hrísgrjónablanda (Basmati & Wild frá Tilda)

» 5 dl kjúklingasoð (vatn og 1 Knorr-teningur)

» 1 stk. laukur

» 3 msk. matarolía

» 3-4 tsk. matarlímsduft, sléttfullar

» 1 stk. smokkfiskbolur

» 250 g hörpuskel

» 250 g rækjur

» 2 dl kjúklingasoð

» ílangt form (20-24 cm)

» plastfilma

Fyrir 12 - 14

Aðferð

Skerið smokkfiskinn í þunna hringi. Setjið smokkfisk og hörpuskelfisk í sjóðandi kjúklingasoð í eina mínútu, bætið þá rækjunum út í. Takið af hitanum og sigtið soðið frá. Geymið á meðan hrísgrjónin eru elduð.

Saxið laukinn og léttsteikið með hrísgrjónunum í olíu, brúnið ekki. Bætið kjúklingasoðinu á pönnuna og sjóðið við vægan hita undir loki í 20 mínútur. Þegar grjónin eru fullsoðin er helmingur þeirra maukaður í matvinnsluvél og síðan blandað saman við hinn helminginn. Matarlímsduftinu blandað saman við á meðan hrísgrjónin eru heit og síðan hörpuskel, smokkfiski og rækjum. Setjið blönduna í formið sem hefur verið klætt innan með plastfilmu og pressið vel niður. Geymið í kæli í 6-8 klst., losið þá úr forminu, skerið í sneiðar og berið fram.