Piparskötuselur á mintusalati

Hráefni

» 600 g skötuselur

» 2 dl balsamedik

» 2 msk. hunang

» 1 stk. hvítlauksgeiri

» 2 msk. sítrónuolía

» 4 msk. fimmpiparblanda, mulin maldon salt

» 1 búnt minta

» 1 búnt rocket salat (arugula)

» 1/4 stk. vatnsmelóna

» 2 tsk. kóríanderfræ

» 1 tsk. sinnepsfræ

» 1 msk. sítrónusafi

» 200 g gráðaostur

Aðferð

Sjóðið saman balsamedik og hunang við vægan hita í um 5 mín. eða þar til blandan er orðin mjög þykk. Kælið. Afhýðið hvítlauk og pressið út í sítrónuolíuna. Hreinsið skötuselinn, ef þess þarf, smyrjið hvítlauksolíu á hann og veltið svo upp úr piparblöndunni. Steikið skötuselinn heilan í 3–4 mín. á hvorri hlið, steikingartími fer eftir þykkt, og saltið aðeins. Blandið saman mintu og rocket salati, skerið vatnsmelónuna í litla bita. Setjið kóríander- og sinnepsfræin í sítrónusafann.

Setjið hunangs-balsamedikblönduna á diska, smá óreglulegar slettur hingað og þangað. Raðið salatblöðunum á diskana og skiptið melónunni jafnt á diskana. Skerið skötuselinn á ská í sneiðar og leggið sneiðarnar á diskana, nálægt miðju, og myljið gráðaost yfir. Stráið kóríander- og sinnepsfræjum og því sem eftir er af sítrónusafanum yfir skötuselinn. Að síðustu er gott að strá smávegis maldon saltflögum yfir.