Humar og vorlaukur með humarfylltu ravíóli

Hráefni

» 18 stk. humarhalar, skelflettir

» 6–12 stk. vorlaukar

» 2–3 msk. smjör

» salt og pipar

Aðferð

Skerið vorlaukana skáhallt í bita. Steikið humar og vorlauka upp úr smjöri á pönnu. Saltið og piprið eftir smekk.

Pastaplötur

Hráefni

» 200 g hveiti

» 2 stk. egg

» 1 tsk. ólífuolía

» 1/2 tsk. fínt salt

Aðferð

Hnoðið hveiti, egg, ólífuolíu og salt vel saman. Pakkið deiginu inn í plastfilmu og látið standa í 1 klst. Fletjið deigið út í lengjur, eins þunnt og mögulegt er, annaðhvort með kefli eða í sérstakri pastavél.

Humarfyllt ravíólí

Hráefni

» Ferskar pastaplötur

» 200 g humar, skelflettur

» 2 stk. vorlaukar

» salt og hvítur pipar

» 1/2 stk. sítróna

» vatn til penslunar

Aðferð

Skerið humarinn í litla bita. Hér er upplagt að nota óflokkaðan humar. Skerið vorlaukana smátt og létt steikið upp úr smjöri. Blandið saman við humarinn. Saltið og piprið og kreistið smá sítrónusafa yfir.

Leggið pastalengjurnar á hveitistráð borð. Setjið eina teskeið af humarmauki með um 4 cm millibili á eina lengju. Penslið kantana með vatni og leggið aðra pastalengju ofan á. þrýstið með fingrunum á kantana, þannig að litlir koddar myndist. Hafið um 11/2 cm kant á hverjum kodda. Skerið á milli með kleinujárni, hníf eða hringlaga formi, allt eftir því hvernig útlit þið kjósið. þrýstið enn og aftur á kantana í þetta sinn með gaffli til þess að kantarnir límist alveg saman. Setjið koddana í sjóðandi léttsaltað vatn. Sjóðið í um 4 mín. í stórum potti. Setjið í sigti og skolið örstutt undir kaldri vatnsbunu. Setjið að lokum smá slettu af ólífuolíu yfir.