Sítrónu- og piparmarineraðar laxasneiðar

Hráefni

» 400 g laxaflök

» 1–2 stk. sítrónur

» blandaður hvítur og svartur pipar

» 4–6 stk. tómatar, vel þroskaðir

» 2–4 stk. vorlaukar

» 1 búnt rúkóla salat

» 4 msk. jómfrúarolía (Extra virgin ólífuolía t.d. frá Monte V.)

» gróft sjávarsalt af fínustu gerð

Aðferð

Beinhreinsið laxaflökin og skerið í þunnar sneiðar, eins skáhallt og mögulegt er, frá sporði. Leggið sneiðarnar á fat. Kreistið safa úr sítrónunum. Veltið sneiðunum jafnt upp úr sítrónusafa. Stráið blönduðum grófkorna pipar yfir. Látið standa í 30 mín.

Hitið grillið í ofninum eða stillið ofninn á hæsta hita.

Raðið laxasneiðunum í ofnskúffu. Setjið inn í ofn í 2–4 mín. eða þar til laxinn hefur „snöggbakast“. Athugið að það er áríðandi að fara ekki frá ofninum heldur fylgjast með laxinum allan tímann.

Skerið tómata í tvennt, fjarlægið kjarna og skerið í strimla. Hreinsið vorlauka og sneiðið þunnt niður. Hreinsið rúkóla salatið og þerrið vel. Skiptið salatinu jafnt á fjóra diska. Látið laxasneiðarnar þar ofan á. Stráið tómatstrimlum og sneiddum vorlauk yfir. Slettið ólífuolíu jafnt yfir diskana og stráið salti yfir. þetta er fljótlegur og bragðgóður laxasmáréttur eða forréttur. Hentar einnig sem hluti af hlað-borði. Berið nýbakað brauð fram með.