Humarrísottó

Hráefni

» 2–3 stk. skalottlaukar

» 1/3 stöngull sellerí

» 2–4 stk. hvítlauksgeirar

» 3 msk. smjör

» 250 g ítölsk rísottó hrísgrjón

» 1 dl hvítvín

» 4–5 dl humarsoð

» 500 g humarhalar, skelflettir

» 2–3 stk. plómutómatar

» gróft sjávarsalt

» hvítur pipar úr kvörn

» lítið búnt ítölsk steinselja

Aðferð

Afhýðið hvítlauk og skalottlauka og skerið smátt. Skerið sellerí í smáa bita. Bræðið smjörið í víðum potti við vægan hita og létt steikið hvítlauk, skalottlauka og sellerí án þess að það taki lit. þegar þetta er orðið mjúkt látið þá hrísgrjónin saman við og hrærið í pottinum. Hafið pottinn áfram á vægum hita, þar til hrísgrjónin eru orðin „glær“. Hellið hvítvíni yfir og smávegis af humarsoðinu. Sjóðið saman við vægan hita og bætið soði út í smátt og smátt eftir því sem grjónin drekka í sig vökvann. þegar um 1/4 er eftir af soðinu og liðnar eru 13 mín. látið þá humarinn út í. Ef hann er stór skerið hann þá í tvo til þrjá bita. Ef hann er aftur á móti smár þá fer hann heill saman við hrísgrjónin. Bætið meira soði út í og hrærið í með sleif, einn og einn snúning með jöfnu millibili.

Fláið tómatana með því að sneiða kross ofan á þá. Setjið í bullsjóðandi vatn í um hálfa mínútu. Takið tómatana upp úr vatninu og setjið beint í ískalt vatn. þá losnar hýðið af og auð-veldara er að flá þá. Skerið tómatana í fernt í báta og fjarlægið kjarna. Skerið tómatkjötið í fínar sneiðar. Gott er að vera búin að þessu fyrirfram. þegar liðnar eru 17–18 mín. eiga grjónin að vera soðin. Látið þá tómatana út í og saltið og piprið eftir smekk. Saxið ítölsku steinseljuna og stráið henni yfir.

Athugið að rísottó á að vera nákvæmlega soðið – þ.e.a.s. enn með biti undir tönn en samt gegnumsoðið! Rísottó heldur áfram að soðna eftir uppgefinn tíma og drekkur í sig allan vökva. þess vegna er áríðandi að tímasetja matreiðsluna vel til að geta borið réttinn fram um leið og hann er tilbúinn. Ef þörf er á meiri vökva bætið þá annaðhvort smá vatni eða soði saman við.

Annað sem er áhugavert að vita þegar bera á fram rísottó er að það er ekki látinn parmesanostur yfir sjávarrétta rísottó, að minnsta kosti ekki ef það á að vera ekta ítalskt. Ástæðan er sú að mönnum finnst hinum einkennandi ostailmi ekki vera ábætandi á fiskilyktina. þetta á nú frekar við í heimalandinu Ítalíu, þar sem oft er mikill hiti og anganin af osti og fiski magnast við hitann. Í kaldara loftslagi, er engin höfuðsynd að dreifa rifnum parmesanosti yfir sjávarréttarísottó. Rétturinn hentar vel sem fyrsti réttur ef halda á ítalska veislu og miðast uppskriftin við fjóra.