Heilt þorskflak, stökkgrillað á roðinu

Hráefni

» 1 stk. smáþorskur, miðlungsstór

» 3–5 stk. hvítlauksgeirar

» lítið búnt steinselja

» 1 dl jómfrúarolía (Extra virgin ólífuolía t.d. frá Monte Vibiano)

» 2 stk. sítrónur

» salt og hvítur pipar

» Meðlæti:

» 1/2 stk. íslensk agúrka

» 4 stk. íslenskir tómatar

Aðferð

Gerið að þorskinum, hreistrið hann og flakið, beinhreinsið og snyrtið. Afhýðið hvítlauk og hakkið hann og steinseljuna. Blandið saman við ólífuolíu. Kreistið sítrónusafa yfir flökin. Saltið og piprið. Gott er að láta flökin standa í um 15 mín. Látið þorskflakið, með roðhliðina niður, á miðlungsheitt grill. Penslið stöðugt með kryddolíunni á meðan verið er að grilla.

Athugið að flakið á að grillast aðeins á roðhliðinni og að hitinn á grillinu ætti helst ekki að vera „brennandi“.

Þegar fiskurinn er farinn að „vinda aðeins upp á sig“, leggið þá fat eða disk ofan á og farið með grillspaðann undir flakið. Losið varlega af grillinu og snúið við, beint á fatið eða diskinn. Hellið afganginum af steinselju-hvítlauksolíunni yfir. Skerið agúrkur í sneiðar og tómata í báta og berið fram með.