Undirstöðusúpa

Hráefni

» 4–6 stk. plómutómatar, vel þroskaðir

» 1–2 stk. laukar

» 1–2 stk. gulrætur

» 1/2 stk. sellerístöngull

» 2 msk. ólífuolía

» 1 tsk. sykur

» tvöfaldur brandí eða koníak

» 2 dl hvítvín

» hnífsoddur saffran

» 1 lítri fiski- eða kjúklingasoð

» sjávarsalt og svartur pipar úr kvörn

Aðferð

Skerið kross örþunnt ofan á tómatana. Setjið þá ofan í bullsjóðandi vatn í 1 mínútu, takið upp úr og snöggkælið í ísköldu vatni. Gott er að setja ísmola út í vatnið, þá á skinnið að losna auðveldlega af. Flysjið tómatana. Setjið tómatana í matvinnsluvél og hakkið gróft, með því að láta vélina vera í gangi stutta stund. Afhýðið lauk og saxið fínt ásamt gulrót og sellerístöngli. Látið ólífuolíuna í víðan, djúpan pott og létt steikið lauk, gulrót og sellerí við vægan hita ásamt sykri. Hrærið stöðugt í með sleif, í um 10 mín. Grænmetið á að taka gullinbrúnan lit og „karamellast“ en varist að láta það brenna við. Skvettið brandíi yfir og kveikið í. Slökkvið bálið með því að hella hvítvíni út í pottinn. Bætið hökkuðum tómötum og saffrani saman við ásamt soðinu og sjóðið við vægan hita í 10–15 mín. Kryddið með salti og pipar og þá er undirstöðusúpan tilbúin. Hana er hægt að gera með góðum fyrirvara.

Hitið undirstöðusúpuna að suðumarki. Látið allan fiskinn út í, setjið lok á pottinn og hafið á hitanum í nokkrar mín. eða þar til súpan og fiskurinn er orðið sjóðheitt. Hellið þá krydduðu ólífuolíunni út í pottinn og hrærið tvo til þrjá hringi með sleif, ofur varlega svo að fiskurinn fari ekki í sundur. Berið súpuna fram í fallegum potti eða súputarínu, með nýbökuðu brauði.