Saltfiskur með ólífum, hvítlauk og chili

Hráefni

» 800 g úrvals saltfiskur, útvatnaður

» 4 msk. hveiti

» 1 dl ólífuolía

» hvítur pipar úr kvörn

»

» 1–2 stk. rauð chilialdin

» 8–16 stk. hvítlauksgeirar

» 1/2 dl jómfrúarolía (Extra virgin ólífuolía t.d. frá Monte Vibiano)

» 1 dl svartar steinlausar ólífur

» salt og pipar

»

» Meðlæti

» 8–12 stk. nýjar kartöflur

» 1 msk. smjör

» 1 msk. fersk steinselja

» 1/2 stk. sítróna, börkur

» gróft sjávarsalt

» hvítur pipar úr kvörn

Aðferð

Skerið saltfiskinn í jafna bita og veltið upp úr hveiti. Látið alla ólífuolíuna í djúpa pönnu og hitið vel. Athugið að olían þarf að vera mjög heit. Steikið saltfiskinn upp úr heitri olíunni fyrst á annari hliðinni og síðan á hinni. Snúið aðeins einu sinni við á meðan á steikingu stendur. Ef saltfiskurinn er ekki fullsteiktur, en orðinn gullinbrúnn og stökkur að utan, setjið hann þá í heitan ofn í nokkrar mín. Piprið eftir smekk.

Fræhreinsið chili og skerið í sneiðar. Afhýðið hvítlauksgeira og skerið í sneiðar. Hitið ólífuolíu á pönnu og létt steikið chili og hvítlauk, án þess að brúna. Bætið svörtu ólífunum heilum út í og saltið og piprið eftir smekk. Skiptið því sem er á pönnunni jafnt yfir saltfiskinn.

Meðlæti

Rífið niður börk af sítrónu. Sjóðið kartöflurnar og afhýðið ef með þarf. Bræðið smjör á pönnu og snúið kartöflunum þar í og stráið svo sítrónuberki og hakkaðri steinselju yfir. Saltið og piprið eftir smekk og berið fram með saltfiskinum.