Lúða með saffrani og rúkóla

Hráefni

» 1 kg lúðusteikur, 8 stk.

» 1 stk. stór hvítlauksgeiri

» 1/2 búnt rúkólasalat

» 1 dl ólífuolía

» 1 tsk. dijon sinnep

» salt og pipar

» 1/2 stk. laukur

» 1 tsk. tómatþykkni (tomato paste)

» 1 tsk. madras karrí

» 1 askja kirsuberjatómatar

» 1/2 stk. lime, safinn

» 1/2 msk. grænmetiskraftur

» 1/2 msk. saffran

» 1/2 dl hvítvín (má sleppa)

» 1 dl rjómi

Aðferð

Afhýðið hvítlauk og maukið í matvinnsluvél með rúkólasalatinu. Bætið olíu og sinnepi út í og maukið saman. Kryddið lúðuna með salti og pipar og hellið rúmlega helmingnum af rúkólapestóblöndunni yfir og kælið fram að steikingu.

Afhýðið laukinn, skerið fínt og steikið í restinni af pestóblöndunni, bætið tómatþykkni og karríi út í. Skerið kirsuberjatómatana í tvennt, bætið á pönnuna og látið krauma við vægan hita í um 3 mín. Bætið þá lime-safa og grænmetiskrafti saman við og látið krauma í 2 mín. Stráið helmingnum af saffrani yfir, hrærið aðeins og setjið til hliðar.

Steikið lúðuna í olíu á heitri pönnu. Hellið hvítvíninu yfir þegar lúðan er steikt og svo tómatsósunni. Látið suðuna koma upp og bætið rjómanum saman við. Stráið restinni af saffrani yfir þegar búið er að færa lúðuna upp á fat eða disk. Ef einhver afgangur er af rúkólapestóinu má nota hann til skreytinga, t.d. með því að láta dropa á víð og dreif um fatið eða diskinn.