Minestronesoð

Hráefni

» 1–2 stk. skalottlaukar

» 5–8 stk. hvítlauksgeirar

» 2–4 stk. gulrætur

» 3-4 stk. kartöflur

» 4–6 stk. plómutómatar, vel þroskaðir eða úr dós

» 4 stk. beikonsneiðar

» 4 msk. svartar steinlausar ólífur

» 1 dl hvítvín

» 2 dl kjúklinga- eða fiskisoð

» lítið búnt steinselja

» 1/2–1 tsk. sykur

» salt og svartur pipar úr kvörn

Aðferð

Afhýðið skalottlauk og hvítlauk og saxið smátt. Flysjið gulrætur og kartöflur og skerið í teninga. Ef notaðir eru ferskir plómutómatar, skerið þá kross í hýðið og setjið í sjóðandi vatn í um hálfa mínútu. Takið þá upp úr og setjið strax í ískalt vatn til þess að hýðið losni af. Skerið heila tómata í litla bita. Skerið beikonið í bita og ólífurnar í tvennt eða þrennt.

Setjið hvítvín og soð í pott og allt niðurskorna grænmetið, svörtu ólífurnar og beikonið. Látið suðuna koma hægt upp og fleytið ofan af alla froðu. Sjóðið við vægan hita í 30 mín. Bragðið á og bætið smá sykri út í. Sykurinn vinnur vel með tómötum og eykur tómatbragðið. Saltið og piprið eftir smekk.