„Velouté“-sósa

Hráefni

» 2 stk. skalottlaukar

» 5 g smjör

» 150 ml hvítvín

» 150 ml Noilly Prat (þurr vermút)

» 300 ml fiskisoð

» 300 ml rjómi

» salt og pipar

Aðferð

Afhýðið og skerið skalottlauka smátt. Bræðið smjör í potti og mýkið lauk þar í. Hellið hvítvíni og vermút út í pottinn og sjóðið niður um helming. Bætið fiskisoði og rjóma út í og sjóðið niður um helming öðru sinni. Kryddið með salti og pipar. Athugið að það er hægt að nota krafttening og vatn í staðin fyrir fiskisoðið.

Reyktir tómatar

Hráefni

» 4 stk. tómatar

» sag

» reykkassi

Aðferð

Afhýðið tómatana með því að rista kross í toppinn, setja í sjóðandi vatn í nokkrar sekúndur og síðan beint í ískalt vatn. Skerið tómatana í fjóra báta og fræhreinsið.

Setjið sag í reykkassa og setjið kassann á eldavélarhellu. Setjið tómatana ofan í kassann þegar hann er orðinn heitur og hafið þá þar í um 3 mín. Takið tómatana þá úr kassanum því gæta verður þess að þeir hitni ekki of mikið.

Humarfrauð

Hráefni

» 200 g humarhalar, skelflettir

» 4 dl vatn

» 2 dl rjómi

» 1 msk. skalottlaukur

» 1 msk. rauð paprika

» 1 msk. fersk fenníka

» 1 msk. graslaukur

» salt og pipar

Aðferð

Setjið vatn í pott og létt sjóðið humarhalana stutta stund. Takið humarinn upp úr vatninu og kælið. Sjóðið soðið niður um 2/3 hluta. Setjið rjómann í annan pott og sjóðið niður um helming. Afhýðið skalottlauk og skerið smátt, í litla teninga, ásamt papriku og fenníku. Saxið graslaukinn. Takið helminginn af humarhölunum og maukið í matvinnsluvél með soði og rjóma. Takið maukið úr matvinnsluvélinni og setjið í skál. Blandið smátt skornu grænmeti og graslauk varlega saman við. Skerið það sem eftir er af humrinum gróft, blandið saman við farsið og smakkið til með salti og pipar.