Bakaður þorskur

Hráefni

» 800 g þorskhnakkar

» 1 stk. stór kúrbítur

» 2 stk. hvítlauksgeirar

» 5 msk. ólífuolía

» 2 sm engiferrót

» 200 g parmesanostur

» 1 stk. lime, börkur og safi

» 3 msk. ferskt oregano

» 20 stk. kirsiberjatómatar

» 1 stk. rauðlaukur

» salt og pipar

» 1 tsk. cumin

Aðferð

Skerið þorskhnakkana í fjögur 200 g stykki. Skerið kúrbít í fjórar sneiðar á lengdina, hafið þær jafn þykkar. Afhýðið hvítlauk og pressið út í ólífuolíuna. Leggið kúrbítssneiðarnar í olíuna, látið liggja í nokkrar mínútur og grillsteikið síðan. Kryddið grillaða kúrbítinn með salti og pipar og leggið síðan aftur í olíuna.

Afhýðið og saxið engiferrót mjög smátt. Rífið helminginn af parmesanostinum mjög smátt og blandið saman við engiferinn. Rífið lime-börkinn og saxið helminginn af oregano og bætið hvoru tveggja saman við parmesanostsblönduna. Veltið þorskhnökkunum upp úr þessari blöndu og leggið síðan í olíusmurt eldfast mót. Bakið þorskinn í ofni, í 5 mín., við 200°C. Skerið tómatana í tvennt, afhýðið og grófsaxið lauk og pressið safann úr lime. Takið þorskinn úr ofninum, setjið kúrbítssneiðarnar í eldfasta mótið með þorskinum og dreifið restinni af parmesanostinum, gróf muldum, yfir kúrbítinn. Setjið síðan tómat, lauk og restina af oregano og kúrbítsendana í litlum bitum við hliðina á þorskinum og kúrbítnum í eldfasta mótinu. Stráið salti, pipar og cumin yfir. Bakið í 10 mín. við 200°C.

Setjið þorskinn á disk. Hellið því sem eftir er í eldfasta mótinu í matvinnsluvél ásamt lime-safa og olíunni sem kúrbíturinn var lagður í og maukið. Smakkið til með salti og pipar eftir smekk.