Heilsteiktur skötuselur með salvíu og beikoni

Hráefni

» 800 g skötuselshali

» 1 búnt salvía

» gróft sjávarsalt

» hvítur pipar úr kvörn

» 1 bréf lúxus beikon

» 1 tsk. ólífuolía

» 2–3 stk. skalottlaukar

» 5–8 stk. hvítlauksgeirar

» 1 dl hvítvín eða rauðvín

» 21/2 dl hænsnasoð

» 2 msk. fersk steinselja

» 2 msk. fersk basilíka

» 2–3 msk. jómfrúarolía (Extra virgin t.d. frá Monte Vibiano)

Aðferð

Beinhreinsið og snyrtið skötuselshalann. Leggið flökin af skötuselshalanum saman, mjóan enda á móti þykkum, þannig að þetta verði jafnþykk rúlla. Leggið salvíublöð á milli. Saltið og piprið eftir smekk. Vefjið lúxusbeikoni utan um og bindið upp með rúllupylsugarni.

Takið víða pönnu og brúnið rúlluna upp úr venjulegri ólífuolíu við meðalhita. Látið í eldfast form.

Afhýðið skalottlauk og hvítlauk, saxið fínt og brúnið á sömu pönnu. Hellið hvítvíni og hænsnasoði yfir. Sjóðið niður þar til soðið er orðið kröftugt í bragði. Saxið steinselju og basilíku og bætið þeim og jómfrúarolíunni, í mjórri bunu, út í og hrærið vel í með sleif. Hellið þessu yfir rúlluna og bakið við 140°C í um 20 mín. þegar fiskurinn er tilbúinn skerið þið utan af honum garnið og skerið hann síðan í 2–3 sm þykkar sneiðar. Berið fram með nýju íslensku grænmeti, stökku salati og ef vill nýbökuðu frönsku langbrauði. Uppskriftin miðast við fjóra.