Svertikryddaður karfi með kreóla grænmeti

Hráefni

» 800 g karfaflök

» 2 stk. laukar

» 5–8 stk. hvítlauksgeirar

» 1/2 stk. græn paprika

» 1/2 stk. rauð paprika

» 3 msk. kornolía til steikingar

» 1 pakki smámaís

» 1 dós niðursoðnir tómatar

» 1 stk. lime, safinn

» 2 tsk. sykur

» cajun- eða kreóla-kryddblanda

» 2 msk. hveiti

» gróft sjávarsalt

» 1 dl kjúklingasoð

» „Basmati Wild“- hrísgrjónablanda

Aðferð

Roð- og beinhreinsið karfaflökin. Afhýðið lauk og hvítlauk og saxið smátt. Fræhreinsið og skerið papriku í teninga. Skerið smámaís í sneiðar. Létt steikið lauk, hvítlauk, papriku og smámaís upp úr 2 msk. af olíu og bætið tómötum, lime-safa og sykri út í. Merjið tómatana aðeins. Kryddið með um 2 tsk. af sterkri cajun eða kreóla kryddblöndu. Sjóðið saman við vægan hita í 8–10 mín. Hellið sósunni í eldfast mót.

Blandið saman hveiti og sömu kryddblöndu og þið notuðuð í sósuna, magnið fer eftir smekk. Steikið karfaflökin við vægan hita. Saltið eftir smekk. Látið karfaflökin ofan á sósuna og stingið inn í 160°C heitan ofn í 5–8 mín. Berið fram með soðnum basmati- og villihrísgrjónum. Uppskriftin miðast við fjóra.