Heilsteikt rauðsprettuflak á steiktum kartöflum

Hráefni

» 1 stk. stór og feit rauðspretta

» 2 msk. smjör

» 1 msk. ólífuolía

» 2 greinar timjan

» 2 stk. hvítlauksgeirar

» gróft sjávarsalt

» hvítur pipar úr kvörn

» soðnar kartöflur

» 1 msk. ítölsk steinselja

» 1 tsk. sítrónubörkur

» gróft sjávarsalt

» 75 g smjör

» 1 sm engiferrót

» 2–3 stk. hvítlauksgeirar

» 1/3–1/2 stk. rautt chilialdin

» 1 stk. lime, safinn

» fersk ítölsk steinselja

» gróft salt

Aðferð

Flakið og snyrtið rauðsprettuna og þerrið flökin á eldhúspappír. Bræðið saman smjör og ólífuolíu á stórri víðri pönnu. Látið heila hvítlauksgeira og timjankvisti á pönnuna. Þegar smjörblandan er farin að freyða og er að verða léttbrúnuð látið þá heilt rauðsprettuflak á pönnuna, með roðhliðina niður. Steikið aðeins á roðhliðinni og ausið stöðugt kryddaðri smjörfeitinni yfir með skeið meðan á steikingu stendur, þar til að roðið er orðið stökkt. Saxið steinselju og rífið sítrónubörkinn fínt. Skerið soðnar kartöflur í sneiðar og steikið á annarri pönnu upp úr smá smjöri eða ólífuolíu. Stráið steinselju og fínt rifnum sítrónuberki yfir. Saltið og piprið eftir smekk. Látið í eldfast fat og setjið rauðsprettuflökin yfir.

Látið smjörið í pott og bræðið þar til það fer að brúnast létt. Afhýðið hvítlauk og fræhreinsið chili. Saxið engifer, hvítlauk, chili og steinselju fínt og látið út í ásamt safa úr einum lime ávexti. Saltið aðeins og piprið eftir smekk.

Látið fatið með rauðsprettunni inn í 200°C heitan ofn í 21/2–4 mín. eða þar til hún er elduð að ofan. Takið úr ofninum og hellið brúnaða kryddsmjörinu yfir. Berið fram sem rétt númer tvö á eftir stökku salati að ítölskum sið. Uppskriftin miðast við tvo.