Lime- og chilimarineruð lúða „ceviche“

Hráefni

» 200 g smálúðuflök

» 4 stk. lime, safinn

» sjávarsalt

» hvítur pipar úr kvörn

» 1/2–1 stk. rautt chilialdin

» 1/6 stk. agúrka

» 1–2 stk. vorlaukar

» 2 stk. hvítlauksgeirar

» 1–2 stk. avókadó

» 4 msk. jómfrúarolía (Extra virgin ólífuolía t.d. frá Monte Vibiano)

» 2 msk. ferskt kóríander

» 1/2 stk. jöklasalat

» plastfilma

Aðferð

Það er mikilvægt að smálúðan sé ný og fersk. Kreistið safann úr lime og skerið lúðuna í um 4 sm langar þunnar ræmur. Leggið hana á djúpan disk eða skál, saltið aðeins og piprið og hellið lime-safa yfir. Breiðið plastfilmu yfir diskinn og látið standa í kæli í minnst 2 klst. Fiskurinn marinerast í safanum.

Fræhreinsið chili og skerið í fínar sneiðar. Magnið af chili má auka en það ræðst af því hversu bragðsterkan mat fólk vill. Kjarnahreinsið agúrkuna og skerið í litla teninga. Fjarlægið ystu blöðin af vorlauknum og skerið hann svo í þunnar sneiðar. Afhýðið og fínhakkið hvítlauksgeira. Skerið avókadó langsum, fjarlægið steininn, flysjið og skerið í teninga. Blandið öllu grænmetinu saman í skál ásamt ólífuolíu og söxuðum kóríanderlaufum. Breiðið plastfilmu yfir og látið standa í kæli í 1 klst. Blandið kryddlegna fiskinum og grænmetinu saman.

Takið sex stökk jöklasalatblöð, úr innri kjarna, nokkurskonar 6 fallegar salatblaðsskálar. Setjið á diska og skiptið kryddlegnu lúðunni og grænmetinu á salatblöðin rétt áður en rétturinn er borinn fram ferskur og kaldur.