Pastakoddar að hætti Grillsins á Hótel Sögu

Hráefni

» 125g semolina hveiti (ítalskt pasta hveiti)

» 125g hveiti

» 140g eggjarauður

» 1stk egg

» Humarfars

» 200g skelflettur humar

» 50g eggjahvíta

» 100g rjómi

» ögn af hvítlauk

» Kryddjurta olía (olía og ferskar kryddjurtir)

Fyrir 4 - 6 | skoða myndskeið

Ferskt pasta er skemmtilegt að prófa og fyllt pasta er toppurinn á allri pastagerð. Möguleikarnir eru óþrjótandi og aðeins hugmyndaflugið getur stoppað mann!

Aðferð

Best er að gera pastadeig í matvinnsluvél. Öllu hráefni er blandað saman og látið vinnast vel, deigið þvínæst plastað og geymt í kæli í minnst 1 klst.
Handsnúnar pastavélar eru ekki dýrar (fást í fínni eldhústækjabúðum) og einnig eru skemmtilegar pastavélarnar á KitchenAid hrærivélunum, sem eru til á mörgum heimilum. Loks er hægt að kaupa útflatt pastadeig í stórmörkuðum.
Fyllingin er lögð á milli tveggja laga af deigi og það svo penslað með vatni eða eggjarauðu til að pastablöðin festist saman.
Loks er pastadeigið skorið í sundur með hnífi, kleinujárni eða pizzahníf.

Pasta koddarnir eru eldaðir við suðu í 1-3 mín eftir stærð og framreiddir eftir smekk, sem meðlæti, forréttur eða aðalréttur

Á Grillinu eru koddarnir fylltir með humar sem er unnin í matvinnsluvél með eggjahvítum og rjóma, kryddað til með salti og ögn af hvítlauk og framreiddir í kryddjurtaolíu sem meðlæti með steiktum humarhölum og brokkálsmauki.

Brokkkálmauk

Hráefni

» 500g Græni hlutinn af brokkkáli

» 1 l Vatn (sjóðandi)

» smá Smjörklípa (má sleppa)

» salt og pipar

Fyrir 4 - 6 | skoða myndskeið

Hér er auðveld lausn fyrir þá sem vilja minnka notkun á rjómasósum en hafa í þeirra stað hollt, bragðmikið og framandi meðlæti úr ódýru hráefni.

Aðferð

Eldið græna hlutann af brokkkálinu í 4 mínútur í sjóðandi vatni með ögn af salti. Færið kálið upp úr vatninu og maukið í matvinnsluvél þar til silkimjúk áferð er komið á maukið. Kælið hratt til að viðhalda græna litnum og hitið upp rétt áður en á að framreiða maukið með ögn af köldu smjöri ásamt salti og pipar eftir smekk. Einnig má þynna maukið út með mjólk eða vatni og þá er holl mauksúpa orðin til.