Veitingahúsadómar | vinotek.is | 9. júní

Madonna

Madonna við Rauðarárstíg er einn af þessum litlu reykvísku veitingastöðum sem lítið fyrir fer, lítið er rætt um en heldur áfram starfsemi sinni ár eftir ár. Á heimasíðu Madonnu kemur fram að hann hefur verið rekinn af sömu fjölskyldu frá árinu 1987. Andrúmsloftið er líka heimilislegt. Ítalskur vertinn tók kumpánlega á móti gestum sem greinilega voru fastagestir og átti þess á milli í háværum samræðum á ítölsku við starfsfólk í eldhúsi.
Yfirbragðið staðarins er svona Ítalíu-ítalskt, þ.e. í þeim anda sem veitingahúsið Ítalía hefur mótað. Skrautmunir og myndir á veggjum í löngum röðum, birtan takmörkuð, gestir sitja í básum með skrautlegu áklæði og glerplötur eru á borðplötum.

Matseðill var sömuleiðis í því sem kalla má norður-evrópskan Ítalíu-stíl af gamla skólanum. Mikið af pitsum með margvíslegu áleggi og greinilegt að hugmyndafluginu hefur stundum verið gefinn laus taumur. Pastaréttir flestir með einhvers konar rjómasósum og í forrétt hægt að fá snigla eða rækjukokkteil.

Við byrjuðum hins vegar á humarsúpu sem var hluti af seðli dagsins. Hún var þykk, hveitisúpa af gamla skólanum með rjómatoppi, töluverðu af humarkurli og miklu og ágætu humarbragði.

Pitsur voru hlaðnar osti og öðru meðlæti. Pepperoni á pepperoni-pitsu hefði mátt vera meira í magni og meira afgerandi í bragði en nóg var hins vegar af sveppum og grænni papriku.

Lasagna var sérstakt. Stór og mikill lasagna-hlunkur sem synti um í miklu magni af tómata-ostasósu í skálinni. Þungur og allt að því óárennilegur réttur. Salat til hliðar; iceberg, rifnar gulrætur og gúrka með ágætri dressingu.

Með súpu og lasagna var boðið upp á hvítlauksbrauð, löðrandi í smjöri.

Við þurftum að bíða töluvert lengi eftir þjónustu, ætli það hafi ekki tekið um tíu til fimmtán mínútur frá því við settumst niður þar til þjónninn gaf sig að okkur aftur sem er nokkuð langur tími miðað við það að þetta er lítill staður sem var langt í frá fullsetinn þetta kvöld. Þegar hann kom var hins vegar ekki yfir neinu að kvarta, þjónustan heimilisleg og vinaleg í þeim anda sem búast má við á stað sem þessum.

Madonna er staður sem er svolítið út úr hringiðunni, eins konar hverfisfjölskyldustaður sem heldur sínu striki ár eftir ár óháð tískusveiflum og virðist eiga nóg af fastakúnnum sem kunna að meta þá stefnu.

2.0 stjörnur

Sjá einnig vinotek.is

Grillmarkaðurinn

6.5. Það er rétt um ár síðan að Grillmarkaðurinn opnaði dyr sínar og staðurinn hefur fest sig í sessi sem einn af vinsælustu veitingastöðum landsins. Staðsetningin gæti auðvitað ekki verið betri í nýbyggingunum á horni Lækjargötu og Austurstrætis sem voru reistar í kjölfar bruna árið 2007. Meira

Tapasbarinn

30.10. Tapasbarinn í Hlaðvarpanum er fyrir löngu búinn að festa sig í sessi sem einn af vinsælustu veitingastöðunum í Reykjavík. Það er yfirleitt mikið að gera og gjarnan fullt út úr dyrum. Tapasmenningin spænska sem byggir á smáréttum sem gjarnan eru borðaðir við barborðið virðist eiga vel við Íslendinga. Stemmningin á Tapasbarnum er líka ansi suðræn, það er matarlykt í loftinu, angan af hvítlauk og grilluðum fisk og kjöti, líf og fjör á flestum borðum. Meira

Kolabrautin

29.9. Það verður ekki af Kolabrautinni tekið að umgjörðin utan um hana er á heimsmælikvarða. Þótt bygging Hörpunnar hafi verið umdeild er húsið ekkert annað en listaverk. Það vakti töluverða spennu þegar tilkynnt var á sínum tíma að hjónin Leifur Kolbeinsson og Jónína Kristjánsdóttir, áður veitingamenn á Primavera, og Jóhannes Stefánsson, oft kenndur við Múlakaffi, myndu taka að sér veitingarekstur í hinu nýja og glæsilega tónlistarhúsi. Meira

Argentína steikhús

21.3.2011 Það eru nokkrir veitingastaðir orðnir að eins konar fasta í íslensku veitingahúsalífi. Steikhúsið Argentína við Barónsstíg er óneitanlega í þeim flokki. Argentína er einhvern veginn alltaf söm við sig og alltaf jafnvinsæl meðal gesta. Meira

Austur Steikhús

1.7.2010 Austur Steikhús heitir veitingahúsið sem opnaði fyrr á árinu í fyrrum aðalútibúi gamla Búnaðarbankans við Austurstræti. Nafnið vísar væntanlega jafnt til staðsetningarinnar sem þess að eitthvað er sótt til Austurlanda í matargerðinni. Meira

Fiskifélagið

2.11.2009 Það var að mati margra að bera í bakkafullan lækinn að ætla að opna veitingahús í kjallara í Kvosinni þar sem áhersla væri lögð á fusion-matargerð. Þar voru þegar til staðar tveir slíkir staðir, Sjávarkjallarinn og Fiskmarkaðurinn, þegar Fiskifélagið opnaði dyr sínar í sumar fyrir gestum. Ljóst var að staðurinn yrði að marka sér sérstöðu á þessari sillu matargerðarinnar. Meira

101

23.9.2009 Hótelið 101 markaði ákveðin tímamót þegar það opnaði dyr sínar í mars 2003. Það var fyrsta íslenska boutique-hótelið. Lítið, hrikalega hipp og kúl og hugsað fyrir hverju einasta smáatriði í hönnun og skreytingum. Það var greinilegt að nýtt Ísland var að fæðast, alþjóðlegt og spennandi og … jæja það héldum við að minnsta kosti þá. Meira

Dill

16.8.2009 Veitingastaðurinn Dill hefur vissulega töluverða forgjöf á marga nýja staði. Það er ekki á hverjum degi sem að menn fá tækifæri til að opna veitingastað í húsi hönnuðu af sjálfum Alvari Aalto. Meira

Orange

4.8.2009 Í gegnum glerhurðina sem leiðir úr matsalnum inn í eldhúsið má sjá mann íklæddan hvítum sloppi með skíðagleraugu og risavaxna slaufu burðast með þunga kúta. Sjá má gesti gauta spurulum augum hvor til annars? Hvar erum við eiginlega stödd? Er þetta eldhús eða er þetta tilraunastofa? Meira

Heimilislegur Laugaás

23.7.2009 Það eru þrír áratugir liðnir frá því að veitingahúsið Laugaás opnaði fyrst dyr sínar fyrir gestum. Þau eru ekki mörg íslensku veitingahúsin sem geta státað af svo langri tilveru hvað þá að árin hafi liðið án þess að breytingar yrðu á rekstrarhaldi og yfirmatreiðslumanni. Meira

Mars og Venus

30.6.2009 Það er líklega vart hægt að hugsa sér ólíkari staði en Hamborgarabúlluna og matstofuna Maður lifandi. Það eina sem þessir staðir eiga sameiginlegt er að þeir eru "skyndibitastaðir" í þeirri merkingu að ekki þarf að bíða lengi eftir matnum og ekki þarf langan tíma til að borða hann. Alla rétti er sömuleiðis hægt að taka með sér heim eða í vinnuna og í báðum tilvikum eru staðirnir orðnir að eins konar "keðjum" þ.e. nokkur útibú eru starfrækt. Meira

Hótel Holt

12.6.2009 Holtið hefur allt frá upphafi haft sérstöðu í hópi íslenskra veitingahúsa. Það hefur verið ákveðinn fasti, vin þar sem hefðir og gæði eru í hávegum höfð. Holtið hefur verið uppeldisstöð margra okkar bestu matreiðslumanna og þjóna. Það hefur verið leiðandi í þróun matreiðslu og vínmenningar á veitingahúsum. Vissulega hafa sum tímabil í sögu Holtsins verið betri en önnur en alla jafna hefur það verið það viðmið þegar kemur að gæðum og þjónustustigi sem aðrir í geiranum hafa til hliðsjónar. Meira