Veitingahúsadómar | vinotek.is | 3. júní

Bistro Geysir

Franska hugtakið bistro er allajafna notað yfir veitingahús sem bjóða fram einfaldan og heimilislegan mat sem er fljótur að koma á borðið og kostar ekkert sérstaklega mikið. Dæmigert Parísar-bistro býður þannig upp á nautasteik með frönskum, salat með vinaigrettu, hana í víni og annað í þeim dúr.
Ein nýjasta viðbótin við veitingahúsin í miðborginni er Geysir bistro sem er í Geysishúsinu á horni Aðalstrætis og Vesturgötu, fyrir ofan hinn ágæta Sjávarkjallara.

Það er bjart yfir salnum á Geysi, fura á gólfi og ljósir litir ríkjandi auk þess sem skærrauðir sófar og skemmtileg lýsing setja sterkan svip á salinn. Eldhúsið er hálfopið inn af barnum/kaffihúsaskenkinum þar sem á daginn er boðið upp á kaffihúsafæði.

Sem kvöldverðarstaður má segja að Geysir standi ágætlega undir því að vera íslenskt bistro og réttirnir í samræmi við áratugagamlar íslenskar hefðir: Djúpsteikur Camembert með sultu, sjávarréttasúpur, ýsa í gratíni, buff og lambasteikur auk þó nokkurs úrvals af samlokum og borgurum, allir að sjálfsögðu með kokkteilsósu og frönskum. Þetta er svona fínni útgáfa af íslenska vegaeldhúsinu enda erlendir ferðamenn ríkjandi í gestahópnum, að minnsta kosti þegar ég hef verið þarna.

Þó nokkur fjöldi smárétta er í boði og má nefna ágætan djúpsteiktan jalapeno og mossarella-stangir með salsa og ostasósu, brúskettu með hvítlauk, tómat, osti og steinselju og nachos-flögur með öllum tilheyrandi sósum. Smáréttirnir eru ágætir og ekki því marki brenndir að vera teknir tilbúnir úr frystinum og hitaðir upp - eins og svo algengt er með svona rétti - heldur tilbúnir á staðnum. Brúskettan vel grilluð og nachos-flögurnar greinilega steiktar í eldhúsinu, helst að þær hefðu dregið í sig of mikla olíu.

Saltfiskur var meðal-útvatnaður skv. íslenskri hefð með kartöflum og frekar bragðdaufu tómatamauki. Lambagrillsteik hins vegar meyrt og bleikt stykki úr læri, eldað líkt og beðið var um, með hálfri skel af kartöflu fylltri með smjörmiklum pommes duchesse (fínt orð fyrir bakaða kartöflumús) og steikta bita af gulrótum, blómkáli og brokkólí. Með þessu svo mikið af góðri béarnaise-sósu.

Þjónusta var hröð, skilvirk og glaðlynd, borðbúnaður frekar billegur (gaffallinn bognaði þegar ráðist var á kjötið) og vínlistinn sæmilegur. Verðlag er hins vegar þægilegt fyrir innlenda sem erlenda gesti, smáréttirnir flestir um eða innan við þúsundkallinn og aðalréttirnir fara ekki mikið yfir tvöþúsundkallinn.

3.0 stjörnur

Sjá einnig vinotek.is

Grillmarkaðurinn

6.5. Það er rétt um ár síðan að Grillmarkaðurinn opnaði dyr sínar og staðurinn hefur fest sig í sessi sem einn af vinsælustu veitingastöðum landsins. Staðsetningin gæti auðvitað ekki verið betri í nýbyggingunum á horni Lækjargötu og Austurstrætis sem voru reistar í kjölfar bruna árið 2007. Meira

Tapasbarinn

30.10. Tapasbarinn í Hlaðvarpanum er fyrir löngu búinn að festa sig í sessi sem einn af vinsælustu veitingastöðunum í Reykjavík. Það er yfirleitt mikið að gera og gjarnan fullt út úr dyrum. Tapasmenningin spænska sem byggir á smáréttum sem gjarnan eru borðaðir við barborðið virðist eiga vel við Íslendinga. Stemmningin á Tapasbarnum er líka ansi suðræn, það er matarlykt í loftinu, angan af hvítlauk og grilluðum fisk og kjöti, líf og fjör á flestum borðum. Meira

Kolabrautin

29.9. Það verður ekki af Kolabrautinni tekið að umgjörðin utan um hana er á heimsmælikvarða. Þótt bygging Hörpunnar hafi verið umdeild er húsið ekkert annað en listaverk. Það vakti töluverða spennu þegar tilkynnt var á sínum tíma að hjónin Leifur Kolbeinsson og Jónína Kristjánsdóttir, áður veitingamenn á Primavera, og Jóhannes Stefánsson, oft kenndur við Múlakaffi, myndu taka að sér veitingarekstur í hinu nýja og glæsilega tónlistarhúsi. Meira

Argentína steikhús

21.3.2011 Það eru nokkrir veitingastaðir orðnir að eins konar fasta í íslensku veitingahúsalífi. Steikhúsið Argentína við Barónsstíg er óneitanlega í þeim flokki. Argentína er einhvern veginn alltaf söm við sig og alltaf jafnvinsæl meðal gesta. Meira

Austur Steikhús

1.7.2010 Austur Steikhús heitir veitingahúsið sem opnaði fyrr á árinu í fyrrum aðalútibúi gamla Búnaðarbankans við Austurstræti. Nafnið vísar væntanlega jafnt til staðsetningarinnar sem þess að eitthvað er sótt til Austurlanda í matargerðinni. Meira

Fiskifélagið

2.11.2009 Það var að mati margra að bera í bakkafullan lækinn að ætla að opna veitingahús í kjallara í Kvosinni þar sem áhersla væri lögð á fusion-matargerð. Þar voru þegar til staðar tveir slíkir staðir, Sjávarkjallarinn og Fiskmarkaðurinn, þegar Fiskifélagið opnaði dyr sínar í sumar fyrir gestum. Ljóst var að staðurinn yrði að marka sér sérstöðu á þessari sillu matargerðarinnar. Meira

101

23.9.2009 Hótelið 101 markaði ákveðin tímamót þegar það opnaði dyr sínar í mars 2003. Það var fyrsta íslenska boutique-hótelið. Lítið, hrikalega hipp og kúl og hugsað fyrir hverju einasta smáatriði í hönnun og skreytingum. Það var greinilegt að nýtt Ísland var að fæðast, alþjóðlegt og spennandi og … jæja það héldum við að minnsta kosti þá. Meira

Dill

16.8.2009 Veitingastaðurinn Dill hefur vissulega töluverða forgjöf á marga nýja staði. Það er ekki á hverjum degi sem að menn fá tækifæri til að opna veitingastað í húsi hönnuðu af sjálfum Alvari Aalto. Meira

Orange

4.8.2009 Í gegnum glerhurðina sem leiðir úr matsalnum inn í eldhúsið má sjá mann íklæddan hvítum sloppi með skíðagleraugu og risavaxna slaufu burðast með þunga kúta. Sjá má gesti gauta spurulum augum hvor til annars? Hvar erum við eiginlega stödd? Er þetta eldhús eða er þetta tilraunastofa? Meira

Heimilislegur Laugaás

23.7.2009 Það eru þrír áratugir liðnir frá því að veitingahúsið Laugaás opnaði fyrst dyr sínar fyrir gestum. Þau eru ekki mörg íslensku veitingahúsin sem geta státað af svo langri tilveru hvað þá að árin hafi liðið án þess að breytingar yrðu á rekstrarhaldi og yfirmatreiðslumanni. Meira

Mars og Venus

30.6.2009 Það er líklega vart hægt að hugsa sér ólíkari staði en Hamborgarabúlluna og matstofuna Maður lifandi. Það eina sem þessir staðir eiga sameiginlegt er að þeir eru "skyndibitastaðir" í þeirri merkingu að ekki þarf að bíða lengi eftir matnum og ekki þarf langan tíma til að borða hann. Alla rétti er sömuleiðis hægt að taka með sér heim eða í vinnuna og í báðum tilvikum eru staðirnir orðnir að eins konar "keðjum" þ.e. nokkur útibú eru starfrækt. Meira

Hótel Holt

12.6.2009 Holtið hefur allt frá upphafi haft sérstöðu í hópi íslenskra veitingahúsa. Það hefur verið ákveðinn fasti, vin þar sem hefðir og gæði eru í hávegum höfð. Holtið hefur verið uppeldisstöð margra okkar bestu matreiðslumanna og þjóna. Það hefur verið leiðandi í þróun matreiðslu og vínmenningar á veitingahúsum. Vissulega hafa sum tímabil í sögu Holtsins verið betri en önnur en alla jafna hefur það verið það viðmið þegar kemur að gæðum og þjónustustigi sem aðrir í geiranum hafa til hliðsjónar. Meira