Síðustu mánuðir hafa verið erfiðir hjá mér líkamlega. Ég er búin að vera að undirbúa mig fyrir Íslandsmót, Evrópumeistaramót, mörg stórmót og Ólympíuleikana. Erfiðar æfingar, veikindi, ennþá fleiri erfiðar æfingar og ennþá verri veikindi hafa verið allsráðandi hjá mér. Ég fékk lungnabólgu í vetur og það setti strik í reikninginn. Í hvert skipti sem ég hef keppt á síðustu mánuðum hef ég verið að klóra mig í gegnum einhverskonar veikindi eða sýkklalyfjakúra og þar af leiðandi erfiðað meira en ég hef gert áður. 

Þegar hlutirnir ganga ekki upp einsog maður ætlar að þeir gangi upp þá dettur maður oft niður í vonleysi. Ég gerði það allavega á sínum tíma og fór í gegnum allskonar stress og vanlíðan útaf þessu öllu. Það gerir engum gott að líða illa og rembast í lífinu. Ég gerði mitt allra besta á öllum æfingum og hef sem betur fer náð mér á strik og er önnum kafin við að undirbúa mig fyrir Evrópumeistaramótið í Ungverjalandi sem hefst í næstu viku. Loksins líður mér vel og orkan er komin aftur. 

Það sem hjálpaði mér mikið var setning sem ég heyrði í vetur. <Mundu að skilja að tilfinningar þínar og gildismat þitt>  Ég hugsaði mikið um þetta. Já, ég ætti nú að geta það, hugsaði ég. Vonleysið sem kom upp í huga mér nokkrum sinnum þegar ég sat uppi í sófa, vafin í sæng og teppi að hósta úr mér líffærin, dró mig svakalega niður andlega. Allt í einu fannst mér ég bara 'nó good' einsog maður segir, í öllu. 

Ef þú ert ekki að standa þig á einu sviði, af hverju ætti það að hafa áhrif á önnur svið í lífinu. Ég elska til dæmis að baka. Þegar ég var þreytt og orkulítil á æfingum þá kom oft upp í huga mér að ég skella mér bara í eldhúsið og baka eitthvað. En um leið og ég ætlaði mér að setja á mig svuntuna færðist yfir mig vonleysi á því sviði líka. Ég hugsaði með mér, hver ætli vilji borða þetta brauð, ég er ekkert góð í þessu. 

Um leið og mér var sagt að skilja að vonleysis tilfinningar mínar og gildismat mitt þá fór að ganga betur. Ég er nú góð í ýmsu og þótt það hafi komið ferlega djúpur dalur í árangri mínum í vetur í lauginni þá ákvað ég að vera samt mjög ánægð með mig. Ég er búin að gera mitt allra besta miðað við aðstæður og það er nokkuð gott.

Ekki leyfa þér að sökkva í dalinn þótt það gangi ekki allt upp einsog þú planaðir. Ef eitthvað eitt í lífinu er í mínus, ekki draga restina af þér og þínum kostum niður með því. Styrktu þig frekar á þeim sviðum sem eru í plús og ég lofa að líðan þín mun breytast til batnaðar. Það virkaði allavega fyrir mig.