Afþakkaði afmælisgjafir og safnaði fyrir ofurhjóli

Teitur Jónasson, útgáfustjóri Fréttatímans og einn eigenda Kvosarinnar Downtown Hotel, sem er nýtt hótel í hinu fornfræga húsi Kirkjuhvoli gegnt Dómkirkjunni og Alþingishúsinu, hélt upp á fertugsafmælið sitt einmitt þar síðastliðið laugardagskvöld. Í stað þess að þiggja afmælisgjafir óskaði Teitur eftir því við veislugesti að þeir legðu til peninga í sjóð til þess að festa kaup á sérstöku reiðhjóli handa Sunnu Valdísi Sigurðardóttur sem er eini AHC-sjúklingurinn á Íslandi.

„Ég hafði séð að Siggi, pabbi hennar Sunnu, sem er mjög góður vinur minn, hafði auglýst eftir notuðu ódýru Kristjaníuhjóli (svona með kassa) af því að Sunnu langaði svo út að hjóla. Þá kviknaði hjá mér hugmynd að safna fyrir almennilegu hjóli fyrir hana og upplagt að gera það í afmælinu mínu. Ég á nóg af koníaki og kertastjökum,“ segir Teitur.

Hann segir að það hafi reynst erfitt að finna hjól sem hentaði. „Á endanum fundum við hjólið í Þýskalandi og Siggi fór þangað að sækja það. Það var svo Bílaklæðning Ragnars Valssonar sem gaf nýtt áklæði á stólinn til að gera hann skvísulegri og Rafhjól á Grensásvegi gáfu á það rafmótor svo það kæmist víðar. Við náðum svo að safna fyrir hjólinu í afmælinu, sem er afar ánægjulegt. Siggi og Ragga, foreldrar Sunnu, eru algjörar hetjur og mér finnst að sem flestir eigi að leggja þeim lið,“ segir Teitur. 

Þeir sem vilja leggja Sunnu Valdísi lið geta gert það á www.ahc.is.