Stafræna vöruþróunarfyrirtækið Kolibri fagnaði opnun á nýjum skrifstofum á dögunum. Yfir þrjú hundruð gestir mættu til fagnaðarins — en ekki var allt með felldu!
Gylltum einhyrningi, dönskum verðlaunum sem félagið fékk fyrir hönnun á vef 66°Norður, var stolið í partíinu.
„Við vonum að sjálfsögðu að þetta hafi bara verið saklaust grín því þessi verðlaun eru okkur afar kær. Einhyrningar þola illa íslenskt veður svo það er nauðsynlegt fyrir okkur að koma honum inn í stofuhita aftur,“ segir Ólafur Örn Nielsen, einn af stofnendum Kolibri.
Þeim sem geta gefið vísbendingar um hvar einhyrningurinn er niðurkominn er bent á að hafa samband í netfangið hallo@kolibri.is.