Sjálfsmorð sem reyndist eitthvað allt annað

Hraunið, sem er ný íslensk sjónvarpsþáttaröð, hefur göngu sína hjá Sjónvarpinu á sunnudagskvöldið. Fyrsti þátturinn af Hrauninu var forsýndur í Laugarásbíó í gær við mikinn fögnuð viðstaddra.

Hraunið er óbeint framhald sjónvarpsþáttanna Hamarinn sem sýndir voru hjá Sjónvarpinu 2011. Sama teymi gerir þættina en leikstjóri þáttanna er Reynir Lyngdal, Björn Hlynur Haraldsson fer með aðalhlutverkið og handritið gerir Sveinbjörn I. Baldvinsson. Snorri Þórisson og Lilja Ósk Þórisdóttir framleiða þættina fyrir Pegasus. Víðir Sigurðsson sá um myndatökuna en Hraunið var meðal annars myndað á Snæfellsnesi.

Í Hrauninu rannsakar Helgi Marvin, sem leikinn er af Birni Hlyni, andlát sem virðist í fyrstu vera sjálfsmorð en annað á eftir að koma á daginn. Hann lendir í hættu og þarf að horfast í augu við sín eigin myrku skúmaskot. Það ferli getur tekið á.