Sýning Blaðaljósmyndarafélags Íslands, Myndir ársins 2014, opnaði í Gerðarsafni í gær og var ekki þverfótað fyrir fjölmiðlafólki og fyrrverandi fjölmiðlafólki. Á sýningunni eru sýndar 116 myndir sem hafa verið valdar af dómnefnd úr 905 myndum 24 blaðaljósmyndara.
Við sama tækifæri voru veitt blaðamannaverðlaun í fjórum flokkum, þ.e. Blaðamannaverðlaun ársins, Rannsóknarblaðamennska ársins, Viðtal ársins og Umfjöllun ársins. Dómnefnd hefur tilnefnt þrjá í hverjum flokki.
Ritstjórn mbl.is hlaut Blaðamannaverðlaunin 2014 í flokknum umfjöllun ársins fyrir umfjöllun sína um stórbrunann í Skeifunni í júlí. Verðlaunin tileinkar ritstjórnin blaðamanninum Agli Ólafssyni sem lést í janúar síðastliðnum. Egill starfaði hjá Morgunblaðinu í yfir tvo áratugi, aðallega á mbl.is seinni árin, og er sárt saknað af samstarfsmönnum sínum.
Ólöf Skaftadóttir, blaðamaður Fréttablaðsins, hlaut verðlaunin í flokknum viðtal ársins og Helgi Seljan hjá Kastljósinu hlaut verðlaun fyrir rannsóknarblaðamennsku ársins. Jóhann Páll Jóhannsson og Jón Bjarki Magnússon hjá DV hlutu síðan Blaðamannaverðlaun ársins 2014 fyrir umfjöllun sína um lekamálið.
HÉR er hægt að sjá myndir ársins.