Gleðin var við völd í hátíðarsal Gróttu í gær þegar heimsmeistaranum Fanneyju Hauksdóttur var fagnað. Fanney varð heimsmeistari í bekkpressu á föstudaginn þegar hún lyfti 145,5 kg á heimsmeistaramóti í bekkpressu sem haldið var í Sundsvall í Svíþjóð. Afrek Fanneyjar þykir mikið enda lyfti hún rúmlega tvöfaldri líkamsþyngd sinni. 

Illugi Gunnarsson menntamálaráðherra tók á móti Fanneyju og Erla Kristín Árnadóttir, formaður kraftlyftingafélags Gróttu, hélt ræðu. Ásgerður Halldórsdóttir, bæjarstjóri Seltjarnarness, færði Fanneyju styrk frá bænum.