Háskólabíó var þétt setið þegar nýjasta kvikmynd Rúnars Rúnarssonar, Þrestir, var frumsýnd. Öll kvikmyndaelítan var mætt á þessa hátíðlegu stund. Kvikmyndin Þrestir var valin besta myndin á San Sebastián-kvikmyndahátíðinni sem fram fór í Donost­ia-San Sebasti­án á Spáni. 

Þrest­ir er ljóðrænt drama sem fjall­ar um Ara, 16 ára pilt, sem send­ur er á æsku­stöðvarn­ar vest­ur á firði til að dvelja hjá föður sín­um um tíma. Sam­band hans við föður sinn er erfitt og margt hef­ur breyst í pláss­inu þar sem hann ólst upp. Ari end­ur­nýj­ar kynn­in við Láru, æsku­vin­konu sína, og þau laðast að hvort öðru.

Rún­ar Rún­ars­son leik­stýr­ir og skrif­ar hand­ritið að Þröst­um. Mikk­el Jers­in og Rún­ar Rún­ars­son eru aðal­fram­leiðend­ur mynd­ar­inn­ar fyr­ir Ni­mb­us Film. Fram­leiðandi er Birgitte Hald og meðfram­leiðend­ur eru Lilja Ósk Snorra­dótt­ir og Igor Nola. Í aðal­hlut­verk­um eru Atli Óskar Fjalars­son, Ingvar E. Sig­urðs­son, Rakel Björk Björns­dótt­ir og Rade Ser­bedzija. Tónlist mynd­ar­inn­ar er sam­in af Kjart­ani Sveins­syni.

Þrest­ir er önn­ur kvik­mynd Rún­ars í fullri lengd, sú fyrsta var Eld­fjall sem var heims­frum­sýnd á Director‘s Fortnig­ht hluta Cann­es-kvik­mynda­hátíðar­inn­ar árið 2011. Eld­fjall ferðaðist víða um kvik­mynda­hátíðir heims­ins og það sama má segja um tvær stutt­mynda Rún­ars, Smá­fugla  og Síðasta bæ­inn. Síðasti bær­inn hlaut til­nefn­ingu til Óskar­sverðlauna fyr­ir bestu leiknu stutt­mynd árið 2006.