Guðrún Sæmundsen fagnaði útkomu sinnar fyrstu bókar, Hann kallar á mig, í Borgarbókasafninu í Spönginni í Grafarvogi. Bókina gaf hún út sjálf en hún fjármagnaði hana á Karolinafund.

Um er að ræða samtímasögu sem fjallar um fíkn og ofbeldi, vináttu og svik. Bókin leiðir lesandann í tilfinningalegt ferðalag, þar sem sagðar eru tvær ólíkar sögur þeirra Heru og Berglindar (Beggu).

Þær eru jafngamlar og báðar takast þær á við fíknivandann og lífið. Tíminn í sögu Heru spannar tíu mánuði, árin 2010-2011, þegar hún er 28 og 29 ára gömul. Stærsti þátttakandi í lífi Heru er Silla, besta vinkona hennar, sem gefur sögunni skemmtilegan blæ. Saga Beggu nær allt aftur til níu ára aldurs. Farið er yfir áhrifamikil tímaskeið í lífi hennar, hvernig fíknin hefur vald á henni og áhrifin sem það hefur á lífsgöngu hennar.