Samhjálp stóð fyrir landssöfnun fyrir meðferðarheimilið Hlaðgerðarkot. Meðferðarheimilið þarf nauðsynlega nýtt og betra húsnæði svo hægt sé að sinna skjólstæðingum betur. Söfnunin fór fram í beinni útsendingu á Stöð 2 og lögðu margir hönd á plóg til að söfnunin gengi sem best.

Jói og Gugga urðu landsþekkt þegar fylgst var með ferðum þeirra í sjónvarpsþættinum Kompási. Þá voru þau djúpt sokkin í neyslu og virtust ekki eiga mikla von. Eftir að hafa farið í meðferð á Hlaðgerðarkoti náðu þau að snúa við blaðinu og hafa nú verið edrú í tæplega fimm ár. Þau Jói og Gugga geisluðu á söfnunarkvöldinu enda fengu þau nýtt tækifæri þegar þau hættu í neyslu. Einhverjir hafa sagt að ef Jói og Gugga gátu hætt þá ættu líklega allir að geta það.