Veitingastaðurinn Haust Restaurant var opnaður formlega á dögunum og af því tilefni var slegið upp heljarinnar teiti á staðnum. Veitingastaðurinn er á Fosshóteli við Höfðatorg en um 800 manns mættu í opnunarteitið.
Yfirkokkur Haust, Jónas Oddur Björnsson, bauð gestum upp á smakk af árstíðabundnum matseðli staðarins ásamt tilheyrandi guðaveigum. Gestir fengu einnig að bragða á hinum rómaða svarta hvítlauk hans Jónasar Odds stjörnukokks, bragði sem er allt í senn sætt, salt, beiskt og súrt; einstök umami bragðupplifun.
Nýstofnað djasstríó skipað Sigríði Thorlacius, Ómari Guðjónssyni og Inga Birni Ingasyni, lék þekkt íslensk rokk- og pönklög í nýjum djössuðum útsetningum í boðinu.