Kolfinna Von Arnardóttir lét sig ekki vanta þegar Ástarsögum íslenskra kvenna var fagnað. Hún veit hvað ástin getur verið kröftug og dásamleg en sjálf giftist hún Birni Inga Hrafnssyni eftir nokkurra mánaða samband. 

Það var aldeilis blásið í partílúðrana þegar bókinni Ástarsögur íslenskra kvenna var fagnað. Í bókinni eru 50 ástarsögur úr veruleika íslenskra kvenna. Sögurnar eru rómantískar og fyndnar, einfaldar og flóknar, harmrænar og gleðilegar. Stundum gerast þær á örfáum dögum, stundum á nokkrum áratugum. Þær eru einlægar og fallegar og ættu að höfða til allra sem hafa elskað – og líka hinna sem eiga það eftir. 

Boðið fór fram á Loft hostel í Bankastræti og var ákaflega góð stemmning í boðinu. Boðið var upp á svalandi drykki, sól, lifandi tónlist, ást, upplestur og andlega upplifun.