Hönnuðurinn og fagurkerinn Stefán Svan Aðalheiðarson hefur undanfarið stjórnað vinsælli sölusíðu á Facebook, þar sem vönduð merkjavara gengur kaupum og sölum.
Stefán ákvað í kjölfarið að færa út kvíarnar, en hann tók höndum saman með P3-teyminu og opnaði útibú í verslun þeirra. Þeir og þær sem elska merkjavörur geta nú tryllst af gleði því hægt er að fá ótrúlegt góss í versluninni.
Verslunin er sú fyrsta sinnar tegundar á Íslandi, en varningurinn er háklassa „vintage“-merkjavara, frá framleiðendum líkt og Lanvin, Sonia Rykiel og Comme des Garcons. Þar er þó einnig að finna íslenskt eðalgóss, líkt og vörur frá Rey, Skaparanum, Sævari Markúsi og Ása Má.
Að sjálfsögðu var haldið upp á opnunina með skemmtilegri teiti og var margt um manninn.