Arngunnur Árnadóttir sendi frá sér sína fyrstu skáldsögu, Að heiman, á kosningadaginn 29. oktbóber. Útgáfan Partus hélt útgáfuboð í Bókabúð Máls og menningar við Laugaveg 18 og þangað steðjuðu margir eftir að hafa kosið í beljandi rigningu til að fá sér smá brjóstbirtu og hlusta á upplífandi upplestur Arngunnar úr sögunni.

Að heiman fjallar um líf ungs fólks á Íslandi í dag og gerist á nokkrum vikum að sumri þegar aðalpersónan snýr aftur frá höfuðborg hipsteranna, Berlín, til Íslands og reynir að fóta sig á landi þar sem allt er útvaðandi í túrisma. Þetta var falleg og góð stund, Arngunnur las fallega upp og af stöku öryggi, enda vön að koma fram. Arngunnur er einstaklega hæfileikarík því auk þess að vera rithöfundur er hún líka fyrsti klarinettuleikari Sinfóníuhljómsveitar Íslands.