Það var líf og fjör í útgáfuhófi barnabókarinnar Vinir Elísu Margrétar sem var haldið í Hagkaup Kringlunni á sunnudaginn. Bókin seldist eins og heitar lummur enda er um einstakt verkefni að ræða og allur ágóði sölunnar rennur beint til Barnaspítala Hringsins. „Það var rosalega fjölmennt á útgáfuhófinu og það myndaðist röð út úr dyrum. Það þurfti að fá auka sendingu í miðju hófi því bókin rauk út,“ segir Gyða Kristjánsdóttir, móðir Elísu Margrétar Hafsteinsdóttur.
Bókin Vinir Elísu Margrétar er skrifuð til minningar um Elísu Margréti, sem fæddist með alvarlegan heilasjúkdóm og var mikið fötluð, en hún lést í vor, þriggja ára að aldri. Höfundar bókarinnar eru bræðurnir Nökkvi Fjalar og Jóhann Fjalar. Bókin er svo prýdd fallegum teikningum eftir Ingunni Kristjánsdóttur, móðursystur Elísu Margrétar.
Nökkvi, Jóhann, Gyða og Hafsteinn stóðu vaktina ásamt öðrum á sunnudaginn og árituðu og stimpluðu bókina með mynd af handafari Elísu.