Kærustuparið Þórhildur Þorkelsdóttir og Hjalti Harðarson geisluðu á frumsýningu Hjartasteins sem fram fór í gærkvöldi í Háskólabíó. Kvikmyndin gerist í litlu sjávarþorpi á Íslandi. Um er að ræða örlagaríka þroskasögu sem fjallar um sterka vináttu tveggja drengja sem taka sín fyrstu skref inn í unglingsárin og uppgötva ástina.
Guðmundur Arnar Guðmundsson er leikstjóri Hjartasteins en leikarar myndarinnar eru Gunnar Jónsson, Nína Dögg Filippusdóttir, Soren Malling, Baldur Einarsson, Blær Hinriksson, Katla Njálsdóttir, Diljá Valsdóttir, Sveinn Ólafur Gunnarsson, Nanna Kristín Magnúsdóttir, Daniel Hans Erlendsson, Rán Ragnarsdóttir, Sveinn Sigurbjörnsson, Jónína Þórdís Karlsdóttir og Theodór Pálsson.
Hjartasteinn er fyrsta kvikmynd Guðmundar Arnars Guðmundssonar í fullri lengd. Guðmundur hefur getið sér gott orð sem leikstjóri og handritshöfundur á undanförnum árum fyrir margverðlaunaðar stuttmyndir sínar. Þar hefur Hvalfjörður reynst vera sérlega sigursæl, enda unnið til um 50 verðlauna á kvikmyndahátíðum víðs vegar um heiminn, þar á meðal sérstök dómnefndarverðlaun í aðalkeppni kvikmyndahátíðarinnar í Cannes árið 2013.
Hjartasteinn hlaut þann heiður, fyrst íslenskra mynda, að vera heimsfrumsýnd í keppni á kvikmyndahátíðinni í Feneyjum í september 2016. Næstu fjóra mánuði þar á eftir tók myndin þátt í samtals 16 kvikmyndahátíðum víðs vegar um heiminn og hlaut í heildina 17 verðlaun og er því orðin ein af verðlaunamestu íslensku myndum síðari ára.