Það var glatt á hjalla í Frostaskjólinu í gær þegar Þorrablót Vesturbæjar var haldið með glæsibrag. Boðið var upp á alvöruþorramat frá þorrakónginum í Múlakaffi, Jóhannesi Stefánssyni. Guðmundur Reynir Gunnarsson píanósnillingur sem tók þátt í Ísland Got Talent í fyrra sá um að spila dinnertónlist á meðan á borðhaldinu stóð. Ari Eldjárn var ræðumaður kvöldsins, Baggalútur tók lagið og Gummi Ben var veislustjóri. Þegar þeir höfðu lokið sínu hlutverki tóku plötusnúðarnir Gullfoss og Geysir við og sáu til þess að engum leiddist.