Það var glatt á hjalla í Iðnó í gærkvöldi þegar Andaðu með Heru Hilmarsdóttur og Þorvaldi Davíð Kristjánssyni í aðalhlutverkum var frumsýnt. Andaðu er verðlaunaleikrit eftir Duncan Macmillan. Um er að ræða ástarsögu ungs pars sem er á tímamótum í lífi sínu. Þau standa frammi fyrir stærstu ákvörðun lífs sín sem tekur á. 

„Snarpur dúett milli konu og manns í miðjum IKEA-draumnum. Hvað þýðir að eignast barn? Kolefnisspor við að eignast barn eru 10.000 CO2 sem er á við einn Eiffelturn! Ætlum við að vera ábyrgar manneskjur? Erum við réttu manneskjurnar til að eignast barn? Erum við að ofhugsa þetta? Er hægt að skipuleggja líf sitt eins og Excel-skjal?“ segir á Facebook-síðu sýningarinnar. 

Verkinu er leikstýrt af Þóreyju Sigþórsdóttur, Alicja Ziolko sá um hreyfingar, Kjartan Darri Kjartansson sá um lýsingu og sýningarstjóri er Andrea Vilhjálmsdóttir. 

Fjölmennt var á frumsýningunni eins og sést á myndunum hér fyrir neðan.