Sýningin Vöruhönnun á 21. öld var opnuð formlega á laugardaginn á Kjarvalsstöðum. Sigríður Sigurjónsdóttir hönnuður er sýningarstjóri sýningarinnar. Á sýningunni er fólki gert kleift að fá innsýn í helstu strauma og stefnur í faginu hérlendis undanfarin ár.
Mæðgurnar Bentína Björgólfsdóttir og Þóra Hallgrímsdóttir voru á meðal gesta.
Á sýninguna hafa verið valdir hönnuðir og fyrirtæki sem vinna hver út frá sinni áherslu. Þessar áherslur eru upplifun, handverk, staðbundin framleiðsla, efnisrannsóknir, hreyfanleiki og fjöldaframleiðsla. Um leið og verkefnin endurspegla fjölbreytileika fagsins sýna þau tækifærin sem samfélaginu standa til boða með því að nýta krafta skapandi hugsunar.
Í hönnunarfaginu er uppi stöðug krafa um nýjungar og hraða. Verkefnin á sýningunni eru þó ekki af þeim toga heldur eru þau dæmisögur um þróun sem hefur átt sér stað yfir langt tímabil. Að baki þeim liggur raunveruleg og djúpstæð þekking á viðfangsefninu. HÉR er hægt að lesa sér betur til um sýninguna.