Fullt var út úr dyrum í árlegu Októberfesti auglýsingastofunnar H:N Markaðssamskipta sem fór fram um liðna helgi í Bankastræti 9. Veisluhöldin hafa fest sig í sessi og eru orðin ómissandi hluti af viðburðadagatali stofunnar.

Fjöldinn allur af viðskiptavinum og öðrum velunnurum lét sjá sig og er óhætt að segja að hápunkti kvöldsins hafi verið náð þegar íslenska karlalandsliðið í knattspyrnu tók sig til og rúllaði yfir Tyrkina 3-0 eins og allir vita.

„Það kom náttúrulega ekki annað til greina en að húrra upp sjónvarpi og stoppa stuðið meðan á leiknum stóð. Gestirnir okkar voru mjög greinilega á sömu skoðun og myndaðist verulega góð stemning í húsinu. Við héldum svo bara áfram með fjörið að leik loknum,“ segir Ingvi Jökull Logason, framkvæmdastjóri H:N Markaðssamskipta.

Mál manna var jafnframt að húsið hafi hreinlega nötrað í öll þrjú skiptin sem Íslendingar skoruðu mark og þar með var tónninn settur fyrir sturlaða stemninguna út í nóttina.

Sváfnir Sigurðarson og Pálmi Sigurhjartarson héldu uppi fjörinu og töfruðu fram hverja stuðperluna á fætur annarri við gríðarlega góðar undirtektir viðstaddra.