Allir þeir sem reka heimili kannast eflaust við að koma heim úr matvörubúðinni með nokkra stútfulla poka en komast svo að því að eitthvað mikilvægt gleymdist. En núna, með tilkomu iOS 10-stýrikerfisins í iPhone, getur þú minnkað líkurnar á að eitthvað gleymist til muna. Nú er nefnilega hægt að gera innkaupalista í Notes og deila honum með öðrum á einfaldan hátt. Það ætti ekkert að gleymast!
Fyrsta skref er að fara í Settings og svo yfir í iCloud og sjá til þess að það sé kveikt á Notes. Það þýðir að þú getur deilt listum úr Notes með öðrum.
Næsta skref er að fara í Notes-forritið og búa til iCloud-lista. Þar getur þú skrifað inn allt sem þarf að kaupa inn.
Þriðja skref er að smella á hnappinn sem lítur út eins og manneskja með plúsmerki. Þannig getur þú deilt listanum með þeim sem sér um innkaupin með þér. Þá geta þú og viðkomandi skoðað sama listann og breytt og bætt við. Þannig hjálpast allir að við innkaupin og ekkert ætti að gleymast.