Það er mikilvægt að koma vel fyrir og vanda val á myndum á stefnumótasíðum eða forritum eins og Tinder. Fólk á það til að dæma fólk á nokkrum sekúndum út frá einni mynd. Í nýrri rannsókn frá Sydney kemur í ljós að ókunnugir aðilar eru betur til þess fallnir að velja aðlaðandi mynd af þér.
Mydomaine greinir frá þessari rannsókn þar sem þátttakendur völdu mynd fyrir sjálfa sig og völdu síðan mynd fyrir 12 aðra þátttakendur. Myndirnar fóru síðan á netið og þær myndir sem voru valdar af ókunnugum aðila voru taldar meira aðlaðandi en þær myndir sem fólk valdi sjálft.
„Niðurstöðurnar gefa til kynna að fólk tekur ekki góðar ákvarðanir þegar það á að velja aðlaðandi myndir af sjálfum sér til þess að setja sem forsíðumynd á netið,“ sagði David White, aðalrannsakandinn. Það þarf þó að rannsaka ástæðuna á bak við það.