Ýmis heilaleikfimi eins og krossgátur og tungumálalærdómur hefur lengi verið sagður góður gegn hrörnun heilans. Samkvæmt nýrri breskri könnun kemur í ljós að kynlíf gerir það einnig.
Könnunin tók til 28 karla og 45 kvenna á aldrinum 50 ára til 83 ára. Fólkið var prófað í vitsmunalegum æfingum en auk þess var spurt hversu oft það stundaði kynlíf. Í ljós kom að fólki sem stundaði kynlíf að minnsta kosti einu sinni í viku gekk betur í prófinu. „Það er möguleiki að aukin tíðni kynlífsathafna skili sér í betri vitsmunum,“ sagði í skýrslunni.
„Fólk vill ekki hugsa um að eldra fólk stundi kynlíf,“ sagði Heyley Wright, aðalrannsakandinn. „En við þurfum að ögra hugmyndinni í samfélaginu og horfa á hver áhrif kynlífsathafna séu á þá sem eru 50 ára og eldri.“ Hún bætti því einnig við að niðurstaðan gæfi sterka vísbendingu um mikilvægi þess að viðhalda nánu sambandi á seinni árum.