Það kannast margir við það að leita að svörum á Google. Hvort sem það tengist mataræði, heilsu eða jafnvel ástarsambandinu. Það þarf að hafa í huga að ráð sem eru gefin eru bara almenn og eiga ekki endilega við ákveðna einstaklinga enda erum við öll misjöfn. Yourtango tekur þó saman þrjú ráð sem fólk ætti alls ekki að falla fyrir.
1. Aldrei gefast upp
Þó svo að þetta geti verið góð mantra í lífinu á hún ekki alltaf vel við. Sérstaklega ekki í samböndum þar sem staðreyndin er sú að það eru ekki öll sambönd sem eiga að endast. Oft líður fólki betur eftir að það hefur gefist upp og hætt saman.
2. Það þarf alltaf að gera málamiðlanir
Þó svo að það þurfi oft að gera málamiðlanir og gefa eitthvað eftir í samböndum er það ekki alltaf réttlætanlegt. Til dæmis ef annar aðilinn fær frábært starfstilboð erlendis en hinn aðilinn vill alls ekki flytja, þá er ekki sjálfsagt að fórna starfsframanum.
3. Stanslaus samskipti
Við heyrum ekki nógu oft hversu mikilvægt það er að eiga í opnum samskiptum. Það er hins vegar ekki nauðsynlegt að eiga í þessum samskiptum stanslaust. Ef maður er til dæmis reiður, uppstökkur og sár er stundum betra að bíða með að ræða hlutina þangað til maður hefur náð að melta tilfinningar sínar.