Jón Agnar Ólason jonagnar@mbl.is

Annie Mist Þórisdóttir minnti landann á að Ísland er sannarlega best í heimi þegar hún varð heimsmeistari í CrossFit þann 31. júlí á síðasta ári. Nýverið gekk hún til liðs við CrossFit Reykjavík og sinnir þar þjálfun ásamt því að búa sig af kappi undir næstu heimsleika í greininni. Hraustasta kona í heimi deilir hér með okkur sínum óskalista.

Óskaiðjan? Skemmtilegt starf, sem gefur mér færi á að ferðast ef mig langar, hitta og vinna með fólki. Starf sem ég get æft með. Í augnablikinu er ég í draumavinnunni þar sem ég er að ferðast um heiminn að kenna CrossFit ásamt því að vera meðeigandi að CrossFit Reykjavík hérna heima. Seinna meir kemur læknisnám sterkt inn.

Óskamaturinn? Kjúklinga-quesadillas.

Draumabíllinn? Aston Martin DB9. Flottasti bíll í heimi.

Hvað vantar á heimilið? Veistu, ég held að það sé nú lítið sem ekkert.

Hvað langar þig sjálfa helst í? Nýjan bíl eða nýtt hús (hlær).

Hvað er best heima? Íslenska vatnið! Ég hef víða ferðast og það jafnast ekkert á við það.

Ef þú mættir upplifa andartak úr fortíðinni upp á nýtt, hvað yrði fyrir valinu? 31.júlí 2011. Sá ógleymanlegi dagur eins og hann lagði sig.