Anna Mjöll sá Whitney Houston í síðustu viku
Íslenska söngkonan Anna Mjöll Ólafsdóttir sá Whitney Houston á veitingastaðnum Crustacean í Beverly Hills í síðustu viku. Whitney Houston sat á næsta borði við Önnu Mjöll. Houston var með fyrrverandi eiginmanni sínum, Bobby Brown, og dóttur þeirra, Bobbi Christinu, sem er 18 ára.
Anna Mjöll greinir frá því á facebooksíðu sinni að hún hafi þurft að bregða sér frá en var staðráðin í að heilsa upp á þau. Þegar hún sneri aftur voru þau á bak og burt.
„This is so weird, I just saw Whitney, Bobby Brown and Bobbi Christina a week ago having dinner together at the next table @ Crustacean in Beverly Hills - I had to get up and when I got back I was going to stop by their table to tell her I love her, but they had left and she was gone...“ segir Anna Mjöll á Facebook.
Anna Mjöll er búsett í Los Angeles þar sem hún gerir það gott sem söngkona. Hún komst í heimsfréttirnar þegar hún gekk að eiga forríka bílasalann Cal Worthington í apríl í fyrra. Eftir nokkurra mánaða hjónaband skildi leiðir. Anna Mjöll gerði samning við Worthington um að hún mætti ekki tjá sig um skilnaðinn fyrr en hálfu ári eftir lögskilnað.
























