Bobby Brown, fyrrverandi eiginmaður Whitney Houston, er miður sín yfir andláti söngkonunnar sem lést á Beverly Hilton-hótelinu í Los Angeles kl. 15.55 í gærdag.

Talsmaður lögreglunnar í Beverly Hills segir að neyðarlínan 911 hafi fengið tilkynningu um andlátið kl. 15.43. Hótelstarfsmenn hófu þegar lífgunartilraunir á söngkonunni án árangurs. Hún var úrskurðuð látin kl. 15.55.

Söngvarinn Johnny Gill sagði í samtali við CNN-sjónvarpsstöðina að Bobby Brown hefði fengið áfall þegar hann fékk fréttirnar. Það sama má segja um dóttur þeirra, Bobbi Kristinu, sem er 18 ára.

Brown og Houston skildu árið 2007 eftir 15 ára hjónaband. Fréttamiðlar vestanhafs sögðu að unnusti Houston, söngvarinn Ray J, hefði komið að henni látinni en talsmaður söngkonunnar heitinnar neitar því. Talsmaðurinn segir að það hafi verið lífvörður hennar sem kom að henni.

Enn hefur ekki verið staðfest hver orsök dauða hennar var en rannsókn stendur yfir.