„Ætli hann hafi ekki verið svolítið afbrýðisamur“
Fyrirsætan Heidi Klum og tónlistarmaðurinn Seal skildu á dögunum eftir sjö ára hjónaband. Nú berast fréttir af því að þau séu að íhuga að byrja aftur saman. Þetta kemur fram í tímaritinu OK! Heimildarmaður blaðsins segir að þau séu alvarlega farin að ræða framtíð sína og hafi nú þegar sagt börnunum að þau ætli að reyna aftur.
„Þau þurfa að finna út úr þessu í friði, bara tvö ein,“ sagði heimildarmaður.
Klum og Seal þóttu mikil fyrirmyndarhjón og kemur fram í tímaritinu OK! að ástarblossinn á milli þeirra hafi ekki slokknað. Þau eiga fjögur börn samtals en elsta barnið átti hún með fyrrverandi eiginmanni sínum.
„Þau elska hvort annað afar heitt, en þau þurftu að fá smá fjarlægð hvort frá öðru til að meta stöðuna.“
Seal var ósáttur við hversu lítið hann sá af eiginkonu sinni og fannst honum hún vinna of mikið.
„Ætli hann hafi ekki verið svolítið afbrýðisamur út í hana,“ sagði heimildarmaður.
