Tónlistarkonan Solange Knowles gifti sig um helgina og virtist hafa átt fullkominn brúðkaupsdag en sú var ekki raunin. Solange fékk nefnilega mikið ofnæmi á stóra daginn og þurfti að yfirgefa sína eigin brúðkaupsveislu snemma.
Sem betur fer gerði ofnæmið vart við sig seint um kvöldið þannig að hún gat notið veislunnar í dágóðan tíma. Ofnæmið lýsti sér þannig að Solange steyptist öll út í rauðum útbrotum sem hana hefur eflaust klæjað mikið í. Eins og áður sagði yfirgaf Solange veisluna þegar ofnæmið gerði vart við sig og fór systir hennar, Beyoncé Knowles, með henni í bílinn og gerði tilraun til að fela andlit litlu systur.
Ekki er vitað hvað olli ofnæminu en talsmaður Solange vildi ekki tjá sig um málið þegar blaðamaður MailOnline hafði samband.
Þrátt fyrir þessi leiðindi þá geislaði Solange á brúðkaupsdaginn þegar hún gekk að eiga leikstjórann Alan Ferguson. Solange klæddist glæsilegum kjól úr smiðju Humberto Leon fyrir Kenzo í athöfninni en fór svo í samfesting eftir brúðkaupið og hjólaði í eigin brúðkaupsveislu.