Smartland Mörtu Maríu | Frægð | mbl | 28.1.2015 | 18:16 | Uppfært 31.1.2015 13:28

Sigmundur Ernir dagskrárstjóri á nýrri sjónvarpsstöð

Sigmundur Ernir Rúnarsson og Elín Sveinsdóttir verða bæði að vinna á Hringbraut. mbl.is/Eggert Jóhannesson

Sigmundur Ernir Rúnarsson er ritstjóri og dagskrárstjóri á nýrri sjónvarpstöð sem heitir Hringbraut og fer í loftið um miðjan febrúar. Í fréttatilkynningu frá Hringbraut segir að um fjölbreyttan og ókeypis sjónvarps- og vefmiðill sé að ræða sem leggur áherslu á kraftmikla og upplýsandi umræðu um þjóðmál, menningu, heimili, heilsu og lífsstíl.

„Miðlinum er ekki síst ætlað að vera hringiða uppbyggilegra skoðanaskipta um þjóðfélagsumbætur fyrir heimili og fyrirtæki í landinu þar sem umburðarlyndi, víðsýni og jafnrétti eiga að vera leiðarstef í öllum skrifum og þáttagerð, ásamt hlutlægni og mannvirðingu,“ segir meðal annars í fréttatilkynningu.

Björk Eiðsdóttir ritstjóri MAN verður með þátt á Hringbraut. Ljósmynd/Jónatan Grétarsson

Sigmundur Ernir verður ekki einn því fjölmargar þekktar kanónur úr fjölmiðlaheiminum munu vera með þætti og pistla á Hringbraut. Páll Magnússon fyrrverandi útvarpsstjóri verður með þátt á stöðunni og þar verður líka Margrét Marsteinsdóttir fyrrverandi dagskrárstjóri á RÚV, Rakel Garðarsdóttir, Karl Ágúst Úlfsson og Björk Eiðsdóttir ritstjóri MAN.

Páll Magnússon. mbl.is/Árni Sæberg

Á meðal pistlahöfunda er Þorsteinn Pálsson, Valgerður Sverrisdóttir, Þorgerður Katrín Gunnarsdóttir, Helgi Hjörvar, Ragnheiður Ríkharðsdóttir, Vilhjálmur Egilsson, Margrét Kristmannsdóttir og Daði Már Kristófersson, svo nokkrir séu nefndir.

Þorsteinn Pálsson. mbl.is/RAX

Framkvæmdastjóri Hringbrautar er Guðmundur Örn Jóhannsson sem jafnframt er aðaleigandi miðilsins. Tæknistjóri er Sverrir Karlsson og framleiðslustjórn annast Elín Sveinsdóttir. Útsending Hringbrautar hefst nú um miðjan febrúar á rásum 7 hjá Símanum og 25 á Vodafone og vefmiðillinn hefur göngu sína viku síðar. Höfuðstöðvar félagsins eru að Sundagörðum 2 í Reykjavík.