Allt ætlaði um koll að keyra þegar Lili-Rose Depp, dóttir þeirra Vanessu Paradis og Johnny Depp, mætti með móður sinni á tískusýningu Chanel í New York í gær.
Ungfrú Depp, sem er fimmtán ára, var í klæðnaði úr haute couture vorlínu tískuhússins en sýningin fór fram á Park Avenue Armory. Vanessa Paradis, sem nú er 42 ára, átti erfitt með skilnaðinn við stórleikarann á sínum tíma en hann er nú giftur aftur.
Indía Salvör Menuez var einnig meðal gesta en hún er rísandi stjarna á menningar og listasenunni þar vestra. Indía er, eins og við höfum áður greint frá, dóttir Jóhönnu Methúsalemsdóttur skartgripahönnuðar en mæðgurnar hafa búið í New York um árabil.
Óhætt er að segja að gestalistinn hafi verið stjörnum prýddur í gær en meðal gesta voru meðal annars Patti Smith, Beyoncé, Alexa Chung, Lily Collins, Dakota Johnson, Julianne Moore, Nicola Peltz, Dylan Penn, Phoebe Tonkin og sjálfur Pharrell Williams.
Vanessa Paradis, var á sínum tíma andlit fyrir Chanel ilm árið 1991 og 19 árum síðar sat hún fyrir í auglýsingum fyrir Chanel Rouge Coco varalitinn.