Fjölmiðlakonan Sirrý Arnardóttir er mætt aftur á skjáinn. Nú á Hringbraut þar sem hún verður með tvo sjónvarpsþætti á viku. Annarsvegar mun hún dusta rykið af sínum gamala þætti, Fólk með Sirrý, sem hún var með á SkjáEinum fyrir áratug og svo verður hún með þáttinn Líf og List þar sem hún fjallar um áhugaverða hluti í menningu og listum. Ég ákvað að spyrja Sirrý spjörunum úr.
„Það er gaman að vera með sjónvarpsþátt aftur. Ég hafði líka mjög gaman af því að vinna í útvarpi. Og ég saknaði ekki sjónvarpsins enda hafði ég nóg að gera, Útvarpið, kennsla við Háskólann á Bifröst, ég skrifaði fjórar bækur undanfarin ár og hef haldið námskeið víða um land og þjálfað fólk í samskiptafærni. Það hefur aldrei verið ástæða til að sakna einhvers. Núið er oftast best,“ segir Sirrý.
Hvað er það seinasta sem þú keyptir þér og elskaðir?
„Það seinasta sem ég keypti og held mikið uppá eru dúnsokkar frá 66g norður. Ég fer oft í þá á nóttunni. Mjög ósmart, eins og geimfari, en maður sofnar svo vel í þeim.“
Í hverju ætlar þú að fjárfesta næst?
„Ég ætla næst að fjárfesta í sparneytnum bíl (það er alla vega á stefnuskránni).“
Hver er ógleymanlegasti staður sem þú ferðaðist til á seinasta ári?
„Eftirminnilegasti staðurinn sem ég heimsótti á árinu er Louisiana í Bandaríkjunum. Þar sá ég t.d. golfvöll með svamlandi krókódílum í tjörnum og litríkt tónlistarfólk í New Orlins.“
Hver er besti minjagripur sem þú hefur tekið með þér úr ferðalagi?
„Það var gaman að taka með sér krydd, mat og kaffi frá Suðurríkjum Bandaríkjanna og bjóða svo upp á suðurríkja máltíð.“
Hver er sá munaður sem þú gætir aldrei sleppt?
„Ég gæti ekki verið án er nokkuð sem þykir sjálfsagt hér á landi en lúxus í öðrum löndum og það eru heitu sundlaugarnar, heitu og köldu pottarnir eru lúxus sem ég vil ekki vera án.
Uppáhalds smáforrit?
„Ég á ekkert uppàhalds smáforrit en ég er í skýunum yfir facetime. Að geta talað frítt í mynd við fjölskyldumeðlimi í útlöndum er frábært.“